-1-
يا واعظ يا خيبان
يا اللي عملت الجسد والدم
ذكرى
أنت أصلك جبان
خايف من المحبة
حشرت رب المجد في عقلك
فكرة
الذكرى للي غايب
والبعيد اللي سافر
لكن يا خايب
رب الحبايب
راسنا ومصيرنا
حياتنا وقيامتنا
موش بس حاضر
لكنه في القلب جوة
نور وخلاص،
وحياة أبدية
إزاي الجسد والدم
جسد المحبة
دم العهد الجديد
بقى عندك فكرة
السفك دايم
مرة واحدة
انفتح الينبوع
فنقل يسوع،
المحبة
من كلام وتراتيل
لاتحاد أبدي
-2-
ياللي مليت الودان
كلام وموسيقى
وألحان
علشان تدفن القربان
في بير النسيان
وتيجي يا واعظ يا خيبان
تصحي الذاكرة
بكلامك وألحانك
زي الست ثومة (أم كلثوم)
لمَّا كانت كل قهاوي مصر
تقفِّل
وكل مغفل
يجيب الجوزة
ويغرق في بحر الهيام
ويصحى تاني يوم
يلاقي إن أحلام النوم
خلِّت فكره أرض فضاء
مليانة بالخواء
زي بير فاضي
نشف
محتاج لكاس من ثومة
يروي قلبه
ويسكِّت العواء
يا واعظ السكارى
بالكلام والموسيقى
فين الاتحاد
اللي دفنته
بالميكروفون وكلام
يطنطن
يسوع عندك
كده
موش قربان
دكتور
جورج حبيب بباوي
