إهداء إلى الشاعر الكبير
الأستاذ/ أحمد عبد المعطي حجازي
أنا شُفتهم في قلبي
رسومهم حيَّة في فكري
مع كلمات كل إبصالية
قطع برتقالية
من ثوب يسوع المصلوب
عايشة في قلب مرشوم
مكتوب على عضمه بالميرون
شهيد بالصليب مختوم
***
شهادتنا لونها أحمر
دم الشهداء
ولهيب نار القتلة
رسم على حيطان كنايسنا
صورنا الحقيقية
مفيهاش سيوف
تيجان أمرا وصلبان
الخوف موش مرسوم
لا ليه شكل ولا لون
خايف الخوف يبان
***
على قلبنا تاريخ مصر
مكتوب بدم البشر
كرامة الأوطان
مجهولة للجبان
مفيش قاتل شريف
وحش مدمر
***
تكفير الأقباط
شغل شياطين
صعب يعيشوا بشر
كلاب مسعورة
تحرق وتقتل
الله خلقهم همَّا بس
ما خلقش باقي البشر
يبقى مين اللي كفر؟
***
يا احمد يا سامي بالكلام
قلبك قبطي مسلم
أنت مصري بالتمام
ارسم يا عبد المعطي بالكلام
صورة الكافر
اللي محاصر ربنا بالإرهاب
بفكر معفن
مقسِّم حتى حيِّنا
دا شارع الكُفار
ودا شارع الأنصار
لو عرف اِقرأ باسم ربك
الذي خلق
خلق الإنسان من علق
كان ترك كفره
بالبشر
دكتور
جورج حبيب بباوي
