يا فاهم إيمانك قل لي:
كم مرتبة وكم نوع في الألوهة؟
لاهوت درجة أولى، ودرجة ثانية، ودرجة ثالثة،
ولَّا لاهوت واحد غير منقسم؟
***
يا اللي بتنفي حلول الله فينا،
وشاطر قوي باللعب بالألفاظ
الكلمة صار جسداً
انت عاوز ترجَّعه تاني كلمة ولفظ؟
***
اللاهوت يحل (بصيغة المضارع) في يسوع جسدياً
وبعدها وأنتم مملوؤن فيه (كولوسي 2 : 9-10)
ليه بتنكر حلول يسوع فينا بكل حيلة
الإيمان خبر سار مش إنكار
***
هو الابن الأزلي تنازل ليرفعنا
هو خالق، أخذ إنسانيتنا المخلوقة
ولما بنتألِّه نبقى زي إنسانيته
اللي ملهاش حياة بدون الاتحاد الأقنومي
***
يا فاهم إيمانك منين جالك الخلود؟
ومين اللي اداك القيامة؟
إزاي أنت بقيت أبدي؟
زي الله العظيم الأبدي (صلاة الصلح)
***
هو أبدي بالطبيعة
وأنت بالنعمة، صرت أبدي
ولمَّا النعمة تنضاف لأقنومك (شخصك)
تفضل مخلوق، بس برضو أبدي
***
يا شاطر وعامل نفسك لاهوتي
الطاقة والقوة هيَّ استعلانات الحلول
الطاقة والقوة تحولنا لمجد يسوع
***
يا فالح قوللي: خلودك
من جسدك ولا من روحك؟
إن كنت خالد بأي طبيعة،
محتاج ليه يسوع؟
***
يا شاطر وبتلعب بالكلام
يسوع مش كلام
أقنوم تجسد علشانك
يخللي كلامك قد حياتك
***
وسر الشكر، سر القيامة
رجعته للجسد والدم بدون اللاهوت
ضاع منك العزة والكرامة
واتحجزت يا شاطر في الناسوت
***
خايف من ألوهة الرب يسوع
طيب دا دي هيَّ القوة والقدرة
اللي أعلنت تجسده
عاوز الجسد بس، تبقى أريوسي
ولما تفصل اللاهوت،
تبقى حبيب نسطور
وتبقى فعلاً ابن ابوك
***
بتنكر حلول الروح القدس
وتقول عنه ده روح قدس
طيب يا فالح، سبقك مقدونيوس
وقال نفس الكلام الفارغ
فارغ من المحبة والعطية
ارجع للارثوذكسية، وصحح كل أخطائك
وروح عند أبوك البطرك
واعترف بكل ذنوبك
وخذ حِل من خطاياك
وصالح خصومك
لو ماصالحتش اللي عاديتهم
هتلاقيهم مع يسوع
وأنت مع إبليس
أبو كل عداوة
ياريت تسمع صوت المحبة
تِخلَص من أشر محنة
وتبقى بعد عكارة سنين
رسول سلام ومن يسوع هبة
د. جورج حبيب بباوي
