طريق الصلاة لأحد الآباء السواح([1])
-1-
قول يا يسوع
لما تكون موجوع
بالشوق
ارفع قلبك للحبيب
اُطلب قوة الصليب
علشان تقوم من الكسل
وتدوق حلاوة أحلى
من العسل
حلاوة شركة حياة
محفوظة في اسم الإله
-2-
صَلِّي بالَّلي في قلبك
قلبك يتحرر
أوعى تقول كلام
أنت مُش فاهمه
كُل كلام غامض
يرميك في بير فاضي
واطلب الَّلي ناقص
عندك
والمحبة ناقصة دايماً
-3-
أوع توسَّخ لسانك
بشتيمة أو كلمة صعبة
اسم يسوع قدِّس شفايفك
حرر قلبك من الأوهام
صلي وقول عاوزك أنت وحدك
-4-
ما تطلبش حاجات مادية
ده نقص محبة
اللي يطلب الحبيب
ويزوِّد عليه
لسَّه فيه حِتِّة عبودية
-5-
ضيقات الحياة
مع العالم اللي هيزول
ولما تسمع
لا تحبوا العالم
إرمي كل احتياجاتك
علشان تبقى حُر
-6-
م اقدرش أعلِّمك كلام
لكن حطِّيت قدامك
طريق
أوِّله اسم يسوع
وأخره أُقنومه الإلهي المتجسد
وزاد الطريق
الروح
وقربان محبة يسوع (سر الشكر)
فُرن المحبة شديد
طِلع مِنُّه شُجعان
خليك زي مار جرجس
بطل ما يعرفش حياة
بدون يسوع
والموت ربح عنده
زي ما قال بولس الكريم
-7-
صَلِّي يا حبيب الرب
محبة الرب في القلب
صخرة أبدية
تلقاها ثباتك
في كل عواصف ردية
-8-
محبة الرب تدوم
في الزمان زي الأبدية
العواطف زي موج البحر
تيجي وتروح
لكي المينا راسخة
-9-
تعليم الناس الناقص
مغشوش بالخطية
خطية الخوف
والإدانة
وسِم الكراهية
وتحريض الشيطان
على أخوك
وعلى اختك
أول طريق الهلاك
-10-
حِب الرب يسوع
علشان تبقى صلاتك محبة
دكتور
جورج حبيب بباوي
([1]) تقابلت مع هذا الأب في كنيسة الأنبا شنودة الأثرية في 19 يناير 1964. طلب ورقة وقلم، وقال لي أكتب، ووعدته بأن لا أذكر اسمه، وعلَّمني صلوات أحلى من العسل.
