موال مصري أصيل
-1-
في القلب موال مخزون
في شونة ذكرياتك يا مصر
لا يمكن يطلع كله
من الصبح للعصر
-2-
موال 56 وحرب القنال
وزملاء كانوا شركا نضال
ماتوا وافقين زي النخيل
ركوع المصري محال، وأي محال
-3-
ويم عذاب 67
محضرتش، لكن شفت الهزيمة
على تليفزيون الانجليز
وكتب المكتبة والرفوف
حرَّضت معركة العقل
هي أرض المعركة
العقل خلق السلاح
واتخزِّن في شونة الأحزان
معارك العقل في أسباب الهزيمة
-4-
وغابت أجيال وزحفت أجيال
لا تعرف تاريخ ولا جغرافيا
ولا سكة للنضال
تزحف زي جيش نمل الجهل
يدوَّر على المعقول ويقرضه
أو يجره بحبال
-5-
وزحف شعبنا بعد استكانة
واتسرقت ثورته
سرقوها لصوص الضماير
عشاق السلطة والسيف
بغال ترفس وديابة جعانة للسلطة
لقت كدابين زفة في الجامع والكنيسة
وطلعت شمس 30 يونيه
زلزال هد جبال الكذب
حتى السوس في الصوامع،
جت له نوبة صحيان وهرب
والكذب أبو كل صايع
لسة بيدور على اولاده في الكنيسة والجامع
علشان باسم خالقنا
يكسر عضامنا
وينشر عبودية للماضي، تنسف المستقبل
كلابشات فولاذ راكبة على العقول
زاد تقلها رغم تعاقب الفصول
-6-
موالي للمستقبل
في شونة العلم
مكتوب في الأبحاث
متسطر للفهم
موالي يا مصر
لازم تغنيه قبل فوات الآوان
قبل ما زمنك يعدي
وتعيشي في الأوهام
زي زمان
د. جورج حبيب بباوي
