أمانة عليك
مَوّال قبطي
أمانة عليك يا اللي هتيجي من بعدي
تكتب تاريخي بأمانة، والأمانة هيَّ عهدي
أُم الشهداء ولدتني وعاشت في قلبي
لو قطَّعوا قلبي ميت حتة
كل حتة هتقول أنا قبطي
***
أمانة عليك تكتب إزاي اتظلمت
ولا دافِعت عن نفسي، ولا اتحاكِمت
خصيان المعرفة بسكاكين الكذب
نشروا أكاذيب وكلام خسيس
خصيان بلا رجولة جدعان في سوق التدليس
***
اللي ظلموني ناموا في قبور من رخام
وتركوا الظلم عند باب مقابرهم
الصاحي وحده يفهم عمايلهم
تمجيد الموتى وراثة من الفراعنة
يا ريت كنا ورثنا علمهم وفنهم
يا ريت كنا فهمنا ثقافتهم
***
ولما الشماس يقول بي نيشتي
يا ترى عارف حياة اللي بيقول أسمائهم
وشهادتهم ورجولتهم ومحبتهم
ولا حتى دول اتظلموا وضاعت حكايتهم
وأمانة عليك تكتب مين اللي ضَيَّعها
مين لوِّث التعليم
وجه يُشطُب التسليم
***
أمانة عليك تكتب شهادتي
لو كنت تركت أُم الشهداء
كنت هعيش من غير قلبي
حكموا عليَّ وعلى أولادي بالجوع
الغريب أضافني، وحسبوها عليَّ جريمة
مكنش ممكن أشحت على أبواب الكنايس
ولا كان ليَّ مهنة غير أني مسيحي
شهادتي للمسيح هي شغلي
ولا كان ممكن أغيَّر شكلي
وأقطع قلبي من جسمي
وأعيش من غير قلبي
***
أمانة عليك تكتب وتحكي قصة أبونا متى
ووهيب عطالله اللي مات مش لاقي ثمن الدواء
وعاش لاجئ في الأديرة علشان يأكل
وكل اللي مشي في سكته لازم ينضرب
وهرطقوه بالكذب ولازم يقتلوه
ذي أبيفانيوس شهيد قتله الجهل
وأحقادهم نار هتحرق اللي بيخاف
وخصيان ونسوان ساقطات في الميديا
الزنى هو عبادة الأوثان
الميكرفون إله بتحبه النسوان
أمانة تقول مين الإله اللي بنعبده
الخوف ولَّا لقمة العيش ولَّا الشهرة
ومين ثالوث الكذابين
المال والكذب والميكروفون
ولسَّة في موالي كلام كتير
لازم أكتبه لأن العمر بيطير
دكتور جورج حبيب بباوي
